香港電臺廣播劇-故事的故事系列之《日蝕》（蔡浩樑、談月好、劉蓮、張婉君、李司政）
格式：wma
集數：1
日蝕
故事的故事－日蝕
劇本創作：蔡浩樑
版權：香港電台
(1)
男
：
太陽比地球濶四百倍，太陽同地球之間距離比起地球同月球之間嘅距離，又係多四百倍，當太陽、月球同地球之間成一條直線嘅時候，我地會見到太陽俾月球遮住，淨係得番一個金色嘅圓圈，呢個時候就係 － 日蝕，2010年7月11號，當南非世界盃決賽西班牙對荷蘭嘅時候，咁啱有一次 － 日蝕！
(2)
男
：
我係一個15歲嘅好男仔，一個好到唔知點形容嘅好男仔！我成績好，成日做運動，放學就即刻番屋企，最多有時候就去吓圖書館……我唔打機，唔溝女，唔睇鹹書，最多睇吓靚模寫真啲相，我唔食煙、唔「隊」嘢……夠哂好喇！我覺得我已經做得好好！
母
：
喂！幫我攞啲衫去洗衣機洗喇！
男
：
哦！
母
：
跟住「浪」埋佢！
男
：
哦！
男
：
佢係我阿媽，我諗佢都覺得我幾好、幾乖仔…除咗一樣嘢……
母
：
你可唔可以唔好淨係「哦」一聲，乜都淨係「哦」！你好唔鍾意同阿媽講嘢咩？
男
：
我習慣咗「哦」！叫我食飯……「哦」！叫我讀書……「哦」！叫我生性啲……「哦」！因為我知道，只要「哦」，亞媽就唔會「鵝」我咁多！！
(3)
男
：
亞媽，點解要考咁多試嘅？
母
：
唔考試邊有書讀？
男
：
我鍾意讀書咪得囉！
母
：
讀完考吓你，先知你有無認真讀書嘛！
男
：
我肯定已經好認真，可唔可以唔考試？
母
：
唔駛考試，你咪唔讀囉！
男
：
我唔會！
母
：
老師唔知嘛！
男
：
我同你知咪得囉！唔駛考試喇！？
母
：
我都唔知你有無讀書？
男
：
媽，咁你即係唔信我唧！
母
：
你要我信咪考試囉！
男
：
咁我可唔可以去考試，但係唔讀書吖！
母
：
唔得！
男
：
淨係讀書，唔考試哩！
母
：
唔得！
男
：
又唔考試，又唔讀書哩！
母
：
唔得！
男
：
媽……你搵乜嘢呀？
母
：
我搵緊枝棍呀！(行雷)
男
：
類似咁嘅對話實在太多，我決定以後乜嘢都只係用「哦」去答阿媽！
(4)
男
：
我愛唔愛我阿媽呢？不如等我講個故仔俾你地聽……
你地有無聽過過「伊狄帕斯王」呢個人呢？伊狄帕斯係古希臘神話入面一個人物，佢嘅爸爸係萊奧斯國王，佢媽媽柔卡斯塔皇后，咁嘅家庭背境，肯定好幸福喇！你地錯喇！
伊狄帕斯未出世，天神已經話比佢國王爸爸聽，呢個仔會危及佢嘅生命同埋王國，結果點呢？當然一出世父王就想殺咗佢喇！不過，伊狄帕斯佢命硬死唔去！仲長大咗添！
母
：
(碗筷聲)仔，食飯喇！
男
：
哦！
母
：
成晚望住個天做乜唧？傻吓傻吓咁！
(5)
男
：
一出世老豆就要殺佢，不過伊狄帕斯唔死得，仲快高長大，生得英俊不凡！有一日佢騎住馬（騎馬聲），喺一條小路撞到一架馬車，仲同車上人嘈起上嚟，伊狄帕斯一刀、兩刀、三刀，殺晒車上人……原來其中一個係位猛人，係一位國王……亦即係佢老豆萊奧斯國王！(行雷聲)唔駛驚，大家唔駛驚！因為伊狄帕斯根本唔知佢殺咗佢親生爸爸！
母
：
仔，食完未呀？食得咁鬼慢㗎？快啲喇！食完……
男
：
洗碗吖嗎！？
母
：
唔駛你洗喇！你去……騎馬喇！(騎馬聲)
(6)
男
：
唏…唏吔！跑快啲！點解我殺咗嗰個馬車上男人之後……我個心好似有啲又酸又苦嘅感覺？
女怪獸
：
哈……哈……
男
：
你就係嗰隻專門問人問題，唔識答就吞咗佢落肚嘅「女人頭獅子身」怪物？
女怪獸
：
無……錯！我問你，你答唔到，我就吞咗你！
男
：
即管放馬過嚟！(馬叫聲)
女怪獸
：
你尋日、今日同聽日最愛邊個？
男
：
吓……我最愛邊個？ (海浪聲)
男
：
尋日，喺呢個沙灘，我記得啲沙有少少黑黑地，當時我學緊游水……
母
：
係喇！慢慢嚟！伸直對腳喇！
男
：
我飲咗好多啖海水，又鹹又苦……
母
：
拍吓對腳喇！
男
：
佢着住泳衣，企喺度，用手托住我，教我游水……佢係我阿媽！尋日，我最愛佢！
(7)女怪獸：你尋日、今日同聽日最愛邊個？哈……
男
：
今日……我最愛邊個？
（步聲）隔離位個女仔，我跟縱過佢番屋企…
樓下便利店收銀個女仔，我日日都去望吓佢……
學校美術科miss陣香水味我仲記得……
Carol 本寫真我收埋咗喺床下底……
今日……我最愛邊個？
母
：
仔呀！問你字呀？呢個保養個「養」字點寫呀！「養」字呀！？
男
：
今日……我最愛邊個？
母
：
「養」字點寫呀！？你唔係唔識吖嘛？「養」喎！
男
：
今日……
母
：
仔呀！講真吖！你有無諗過「養」我唧！？
男
：
今日……我最愛佢！
(8)
男
：
嘿！你呢隻女人頭獅子身嘅怪物，問題我就答完喇，受死喇！
(刀劍聲)
女怪獸
：
呀………(慘叫)
男
：
好喇！無咗呢隻怪獸，呢個國家嘅人民就安全喇！(人群歡呼聲)
男
：
伊狄帕斯殺咗隻怪獸，救咗國民，仲被推舉成為國王添！
就喺登基嗰日，佢見到一個好靚好靚嘅女人，伊狄帕斯馬上就鍾意咗佢，仲想娶佢為妻添！呢個咁靚嘅女人，就係柔卡斯塔皇后……亦即係伊狄帕斯嘅親生媽媽！(行雷聲)
(9)
男男
：
呀…(大叫)點解呀？
可憐嘅伊狄帕斯當知道自己真正身份之後，真係生不如死，佢大力咁跳，又大力咁叫……佢怨恨自己親手殺死自己嘅老豆，仲娶埋自己親生阿媽做老婆……點可能發生咁嘅事？！最後，伊狄帕斯頂唔順，癲咗，仲用力咁挖自己對眼出嚟！跟住自殺！究竟邊個最可憐？
放棄自己個仔，但又俾個仔殺死嘅國王？
俾人殺咗老公，又嫁番俾個兇手，仲要係自己個仔嘅皇后？
定抑或係一個乜都唔知，但係又錯到不得了嘅仔仔呢？
(10)
男
：
心理學家嘅精神分析論提到，「伊狄帕斯情結」，男仔有一種殺死父親，擁有母親嘅傾向，呢種就係「戀母情意結」！
（笑）如果係咁……我應該好愛我媽！
(11)女怪獸：哈……尋日、今日同聽日你最愛邊個？你仲有「聽日」未答噃！？
男
：
你呢隻「女人頭獅子身」怪物，你想我答你，除非你幫我實現一個「願望」，到時我會識得答你！
女怪獸
：
好！我應承你！你講你嘅願望！
男
：
我要同我阿媽，互相調轉！
女怪獸
：
哈……好！
(12)
男
：
所謂調轉，喺日頭我會變老咗，仲要係變老咗好多！咁我阿媽呢？佢梗係變番好似細路囡咁喇！但係當太陽落下之後，一切就會變回正常，佢繼續可以鬧我、管我同點我做嘢！你話係咪好好玩呢？
哈哈…
母：仔呀！
男：咩事呀？
後生母：仔呀！
男：（老聲）唔好嘈呀！
(13)後生母：(公園聲)仔呀！咁猛太陽嚟公園做乜呀？
男
：
(老聲)我約咗人打波呀！
後生母
：
乜嘢人呀？係唔係壞人呀！？
男
：
喂，你問還問！你摸我啲頭髮做乜呀？
後生母
：
咁我係你亞媽喎！
男
：
家陣日光日白，你把聲、你個樣點都唔似我亞媽喇！你想阻住我，你就死！
後生母
：
唏！到夜晚你就死！
(14)
男
：
果然，到夜晚，無咗太陽之後，我就死喇！ (鞕打、慘叫聲)
(15)
男
：
喺日頭，我好自由，好開心！我可以去做好多以前我唔敢做嘅嘢！打機、睇三級片、追女仔、甚至去酒吧，但係一到夜晚我又變番我阿媽嘅仔、一個細路仔……我就好唔開心！於是我做咗一個決定，帶亞媽去旅行……
(16)
男
：
喺芬蘭，有一個地方叫拉普蘭，呢個地方有一個特色，就係不論日頭定夜晚都係陽光普照，即係24小時太陽都唔會落山……只要我帶亞媽嚟呢個地方，咁我就掂晒喇！
後生母
：
仔呀！行快啲喇！上機喇！去芬蘭喇！(飛機聲)
(17)
男
：
「千湖之國」嘅芬蘭，風景真係好靚……
後生母
：
仔呀，你估我唔知點解你要嚟芬蘭咩？
男
：
係因為呢度嘅太陽唔會落山！
後生母
：
太陽唔落山，你亞媽我就變細路，你就做大人！嘿！你做乜個樣咁尷尬呀，仔！你內疚呀！唔駛喎！其實我都有啲開心㗎！
男
：
開心？
後生母
：
第一，我家陣咁後生，皮膚又滑又白，點會唔開心！第二，我……可以見到你大個咗個，原來……你大個咗咁靚仔！我梗高興喇！
男
：
媽，我帶你去睇一個湖吖！
後生母
：
叫乜嘢名？
男
：
芬蘭第一大湖── 塞馬湖。
(18)
男
：
帶阿媽去塞馬湖，因為我想保持宜家呢個狀態，我想保持我自由自在嘅生活，唯一嘅辦法就係…亞媽……我要佢永遠消失！
後生母
：
嘩！個湖好靚呀！（水聲）
男
：
估唔到2010年7月11號……
亞媽，對唔住呀！唏！（拍擊聲）
後生母
：
仔……你做乜推我落去呀！？ (特別音效── 日蝕)
新聞報道
：
當南非世界盃決賽進行緊嘅時候，一次罕見嘅日全蝕喺南太平洋出現，過程歷時大約五分鐘！
幾千名嘅科學家、記者同遊客，一齊觀賞呢個天文現象……
太陽俾月球遮住，淨番一個金色嘅圈……
後生母
：
仔……你做乜推我落去呀？（水聲及雀仔聲）
男
：
喺阿媽跌落嗰陣，我同阿媽一齊面向湖，就係我地一齊跌落去嘅時候，由水面嘅倒影，我見到日蝕，白天突然之間變咗夜晚……就喺嗰一剎那，我見到阿媽，由細路女慢慢……慢慢變番四十幾、五十歲，額頭嘅縐紋左一條、右一條咁爬番出嚟！眼袋由無變有，魚尾紋由無變有，眼淚由無變有……
後生母
母
：
仔……亞媽唔會怪你！好快就會變番有陽光，你自由喇！
男
：
望到佢面上嘅縐紋，原來亞媽佢已經好老，我亞媽係為咗我而老咗好多！
(19)
男
：
女人頭獅子身怪獸你問我尋日、今日同聽日，我最愛邊個？
我而家可以答你喇！
劇本創作：蔡浩樑
聲音演出：蔡浩樑 飾演 亞仔
談月好 飾演 亞媽
劉蓮 飾演 後生亞媽 同埋 女怪獸
張婉君 李司政 飾演 新聞報導員
《完》
劇本創作：蔡浩樑
聲音演出：蔡浩樑 飾演 亞仔
談月好 飾演 亞媽
劉蓮 飾演 後生亞媽 同埋 女怪獸
張婉君 李司政 飾演 新聞報導員
主演：蔡浩樑、談月好、劉蓮、張婉君、李司政等。
打包下載鏈接：